Nafnið mitt
Mamma og pabbi völdu nafnið Þórdís því að þau eru hrifin af dísarnöfnum og Þórdís er sterkt, kröftugt og með mikinn karakter alveg eins og ég.
Erlu nafnið er síðan í höfuðið á föðurömmu minni, en hún var löngu búin að panta litla nöfnu 
Þórdís:
Nafn þetta er samsett af forliðnum „Þór“ í merkingunni þrumuguðinn Þór úr norrænni goðafræði, og viðliðnum „dís“ sem merkir heilladís.
Bókin Nöfn Íslendinga hefur þetta að segja um Þórdísi og Erlu:
Nafnið kemur fyrir í Landnámu og víða í Íslendinga sögum. Það kemur einnig fyrir í Sturlungu og á fleiri stöðum í fornum bókmenntum. Það er nefnt í bréfi frá 14. öld. Samkvæmt manntali 1703 hétu 394 konur Þórdís en 249 árið 1801. Árið 1910 voru nafnberar orðnir 305, þar af hétu 53 konur Þórdís að seinna nafni. Í þjóðskrá 1989 voru 736 konur skráðar með þessu nafni sem einnefni eða fyrra nafni af tveimur en 107 að síðara nafni. Um forliðinn Þór-, síðari liður er viðliðurinn -dís. Tordis þekkist bæði í Noregi og Svíþjóð.
Afar algengur forliður karla- og kvennanafna. Hann víxlaðist þegar í fornu máli á við forliðinn Þór- þannig að Þor- fór á undan samhljóðum, t.d. Þorbjörn, Þorgerður, en Þór- á undan sérhljóðum og -h-, t.d. Þórarinn, Þórólfur, Þórhildur. Nöfnin Þórdís og Þórný virðast undantekning frá þessari reglu. Þau hafa lengi verið skrifað með -ó- en af elstu heimildum er ekki unnt að ráða hvort myndirnar Þórdís ogÞórný hafi tíðkast til forna þar sem -o- gat staðið bæði fyrir -o- og -ó-. Því má alveg gera ráð fyrir að Þordís og Þorný hafi tíðkast í fornu máli og samræmist það fyrrgreindri reglu. Að baki liggur goðnafnið Þór. Í síðari alda máli hefur aðgreiningin milli Þor- og Þór- riðlast og nafnliðurinn Þór- er nú notaður í æ ríkara mæli. Þannig hafa orðið til tvímyndir af allmörgum nöfnum. Nefna mættiÞorbjörg/Þórbjörg, Þorkatla/Þórkatla, Þorlaug/Þórlaug, Þorbergur/Þórbergur. Nafnliðurinn Þur- í Þuríður á sér sama uppruna. Nafnliðurinn Tor-, í fornsænsku Thor, er talsvert notaður á hinum Norðurlöndunum.
Þór var nafnið á þrumuguðinum í norrænni ásatrú. Nafnið kemur fyrir í nafnatali séra Odds á Reynivöllum frá 1646 en það var ekki notað aftur sem eiginnafn fyrr en á 19. öld, þótt það væri afar algengt sem fyrri liður samsettra nafna. Samkvæmt manntali 1910 hétu níu karlar nafninu, þar af sjö í Ey. og Þing. Á næstu áratugum fjölgaði nafnberum mjög. Á árunum 1921-1950 var 725 drengjum gefið þetta nafn en í þjóðskrá 1989 báru það 5132 karlar, þar af 4777 sem síðara nafn af tveimur. Á þessari öld hefur því notkun nafnsins risið frá núlli upp í fjórða algengasta nafnið í þjóðskrá 1982 með 4111 nafnbera og langalgengasta nafnið sem síðara af tveimur. Árið 1989 er nafnið komið í þriðja sæti og fjölgunin frá 1982 er 1355 nafnberar. Einn nafnberi ritaði nafn sitt Þórr 1989.
Nafnið Thor er þekkt í Danmörku frá því á 14. öld en er talið leitt af Tord, Þórður. Tor eða Thor er þekkt í Svíþjóð frá því á 18. öld en í Noregi komst Tor í notkun á síðustu öld með auknum áhuga á gömlum norrænum nöfnum.
Nafnið Thor er þekkt í Danmörku frá því á 14. öld en er talið leitt af Tord, Þórður. Tor eða Thor er þekkt í Svíþjóð frá því á 18. öld en í Noregi komst Tor í notkun á síðustu öld með auknum áhuga á gömlum norrænum nöfnum.Viðliðurinn -þór kemur fyrir í nokkrum karlmannsnöfnum, t.d. Eyþór, Gunnþór, Hafþór, Steinþór. Af sama uppruna er -ór í nafninu Arnór.
Nafnið Þór samsvarar fornsænsku Þor, Thor, forndönsku Þor, Thor, danskri rúnaristu þur, sbr. fornensku Ðunar, fornsaxnesku Thunar, fornháþýsku Donnar, sem er nafn á þrumuguðinum og þrumunni, nýháþýsku Donner. Nafnið á skylt við latínu tonare "þruma, ymja".
Viðliðurinn -dís er algengur í kvennanöfnum, t.d. Aldís, Bryndís, Guðdís, Valdís.
Nafnið er sömu merkingar og dís „gyðja, goðvera“.
Erla:
Engin Erla var skráð í manntalinu 1910. Á áratugnum 1921-1930 fengu 159 konur þetta nafn en í þjóðskrá 1989 var 1261 kona skráð Erla sem einnefni eða fyrra nafn af tveimur en að minnsta kosti 530 sem síðara nafn.
Árið 1918 gaf Stefán frá Hvítadal út fyrstu ljóðabók sína Söngva förumannsins. Eitt kvæðanna í bókinni ber titilinn Erla. Sigvaldi Kaldalóns samdi lag við kvæðið og kom það út á plötu á milli 1935 og 1940. Hinn vinsæli söngvari þeirra tíma, Hreinn Pálsson, söng lagið. Þetta varð til þess að vinældir nafnsins jukust mjög og það komst í 5.-6. sæti algengustu kvenmannsnafna á árunum 1930-1939. Guðfinna Þorsteinsdóttir skáldkona notar nafnið Erla sem höfundarheiti.
Að baki liggur fuglsheitið erla, stytting á maríuerla.
Þórdís Erla
Þann 1. janúar 2008 báru 10 konur tvínefnið Þórdís Erla skv. þjóðskrá
832 báru nafnið Þórdís sem fyrsta eiginnafn
797 báru nafnið Erla sem seinna eiginnafn
Fallbeyging
| Nefnifall: | Þórdís Erla |
| Þolfall: | Þórdísi Erlu |
| Þágufall: | Þórdísi Erlu |
| Eignarfall: |
Þórdísar Erlu |
Erla, góða Erla - kvæðið sem jók mjög á vinsældir nafnsins
Erla, góða Erla!
Ég á að vagga þér.
Svíf þú inn í svefninn
í söng frá vörum mér.
Kvæðið mitt er kveldljóð,
því kveldsett löngu er.
Úti þeysa álfar
um ísi lagða slóð.
Bjarma slær á bæinn
hið bleika tunglskinsflóð.
Erla, hjartans Erla,
nú ertu þæg og góð.
- Stefán frá Hvítadal